🎼 Espazo Sonoro: música que habita o patrimonio
Espazo Sonoro é moito máis ca un ciclo musical: é unha viaxe sensorial e cultural que, dende unha manchea de anos atrás, transforma espazos singulares galegos, no ámbito terriotial de A Coruña, en escenarios vivos onde a música contemporánea dialoga co pasado, coa paisaxe e coa memoria.
Por xestión de ASAFA, Asociación Sociocultural dos Alumnos Franciscanos, a edición de 2025 abre no Convento de Herbón, enclave de profunda carga espiritual e beleza natural. Este lugar, rodeado de
natureza e historia, acolle a música como forma de celebración e encontro, nunha programación que conmemora os 800 anos do «Cántico das criaturas» de San Francisco de Asís —un canto á fraternidade universal e á beleza da creación.
Neste marco, a música convértese en homenaxe á creación, á fraternidade e á contemplación, valores que inspiraron o Poverello de Asís. Espazo Sonoro non é itinerante por inercia, senón viaxeiro con propósito, buscando espazos que resoen coa esencia de cada proposta artística.
🎶 Concerto inaugural — “A Consagración da Primavera – Baroque Edition”
O domingo 31 de agosto ás 20:30 h, o II Concerto Intempestivo levará ao templo de Herbón unha ousada recreación do ballet de Igor Stravinsky a través da sonoridade e a linguaxe do barroco.
O programa, coidado ata o último detalle, está a cargo de Rahel Boell e Jaume Guri Batlle (violíns), Rebecca Krieg (violoncello) e Eliot Xaquín Dios (cravo), músicos cunha traxectoria conxunta iniciada en Basilea e recoñecida internacionalmente. A súa interpretación mestura arranxos propios e improvisación, abrindo unha ponte entre dous mundos que raramente dialogan: a vangarda de comezos do século XX e a expresividade historicista.
Como preludio, ás 17:30 h, ofrecerase unha visita guiada ao conxunto conventual, permitindo ao público mergullarse na súa historia antes de que a música faga vibrar cada recuncho.
A música, neste espazo de natureza e patrimonio, non só se escoita: respírase, contémplase e celébrase.
